NEW தின மெயில் செய்தி எதிரொலி: செருகளத்தூர் கிராமத்தில் 40 குடும்பங்களுக்கு தனிப்பட்டா வழங்க அதிகாரிகள் கள ஆய்வு

திருவாரூர் மாவட்டம் முத்துப்பேட்டை தாலுகா, கோட்டூர் ஒன்றியத்திற்கு உட்பட்ட செருகளத்தூர் கிராமத்தில் 40 பயனாளிகளுக்கு வழங்கப்பட்ட வீட்டுமனை பட்டா பல ஆண்டுகளாகக் கூட்டுப் பட்டாவாகவே இருந்து வந்தது.

 இதனால், அப்பகுதி மக்களுக்கு அரசு சார்பில் தொகுப்பு வீடுகள் கட்ட  தனிப்பட்டா மற்றும் உரிய எல்லை அளவீடு இல்லாத காரணத்தால் வீடு கட்ட அனுமதி கிடைக்காமல் அவதிப்பட்டு வந்தனர். வேறு வழியின்றி, எந்நேரமும் இடிந்து விழும் நிலையில் உள்ள தங்களின் பழைய வீடுகளிலேயே ஆபத்தான சூழலில் அவர்கள் தொடர்ந்து வசித்து வந்தனர். 

ஏழை மக்களின் இந்த அவல நிலை குறித்து  தின மெயில் நாளிதழில் (அக்டோபர் 29) விரிவாகச் செய்தி வெளியிடப்பட்டது. இச்செய்தியின் எதிரொலியாக, வருவாய்த்துறை அதிகாரிகள் உடனடியாக களத்தில் இறங்கி நடவடிக்கை எடுத்துள்ளனர்.முத்துப்பேட்டை வட்டாட்சியர் (தாசில்தார்) திருமதி பிரேமா, தலைமையில், நில அளவையர், திருமதி சாந்தி, வருவாய் ஆய்வாளர் திரு ஷேக் தாவூது, மற்றும் கிராம நிர்வாக அலுவலர் திரு மாரிக்கண்ணு ஆகியோர் அடங்கிய குழுவினர் இன்று செருகளத்தூர் கிராமத்திற்கு நேரில் சென்றனர்.அங்கு பாதிக்கப்பட்ட பயனாளிகளைச் சந்தித்துப் பேசிய அதிகாரிகள், சம்பந்தப்பட்ட 40 பேரின் வீட்டுமனைகளையும் நேரில் பார்வையிட்டு ஆய்வு செய்தனர். கூட்டுப் பட்டாவில் உள்ள நிலங்களை முறையாக அளவீடு செய்து, பயனாளிகள் தங்களின் வீடுகளை விரைவாகக் கட்டி முடிக்க ஏதுவாக விரைவில் தனிப்பட்டா பிரித்து வழங்க உரிய நடவடிக்கைகள் மேற்கொள்ளப்படும் என அதிகாரிகள் உறுதியளித்தனர்.தினமெயிலில்  செய்தி வெளியானதைத் தொடர்ந்து உடனடியாக நேரில் வந்து நடவடிக்கை எடுத்த அதிகாரிகளுக்கும், தங்கள் குரலை வெளிக்கொண்டு வந்த செய்தியாளர்களுக்கும் கிராம மக்கள் தங்களது நெஞ்சார்ந்த நன்றியைத் தெரிவித்துக் கொண்டனர்