NEW தமிழ்நாடு முதலமைச்சர் தலைமையில் அமைச்சரவைக் கூட்டம்

தமிழ்நாடு முதலமைச்சர் ஜோசப் விஜய் தலைமையிலான, 3வது அமைச்சரவைக் கூட்டம் இன்று (அக்டோபர் 29) சென்னை தலைமைச் செயலகத்தில் நடைபெற்றது. தமிழ்நாட்டில் புதிதாகத் தொழில் தொடங்க முன்வந்துள்ள நிறுவனங்களின் திட்டங்களுக்கு அனுமதி வழங்குவது, ஏற்கெனவே செயல்பட்டு வரும் நிறுவனங்களின் விரிவாக்கத் திட்டங்களுக்கு ஒப்புதல் அளிப்பது தொடர்பான முன்மொழிவுகள், அமைச்சரவைக் கூட்டத்தில் பரிசீலிக்கப்பட்டன.உச்சநீதிமன்ற தீர்ப்பின்படி, செங்கல்பட்டு மாவட்டத்தில் தாழம்பூர் கிராம மக்களுக்கு அவர்களின் நிலம் ஒப்படைக்கும் பொருட்டு பட்டா வழங்க முடிவு செய்யப்பட்டுள்ளது. சென்னை பட்டினப்பாக்கம் பகுதியில் புதிய தலைமைச் செயலகம் அமைப்பது தொடர்பாக தமிழ்நாடு அரசு திட்டமிட்டுள்ளதாகக் கூறப்படும் நிலையில், இதற்கு எதிர்ப்பு தெரிவித்து அரசியல் கட்சியினர் மற்றும் மீனவர்கள் போராட்டங்களில் ஈடுபட்டு வருகின்றனர். இந்தச் சூழலில், புதிய தலைமைச் செயலகம் அமைப்பதற்கான மாற்று இடங்களைப் பரிசீலிப்பது உள்ளிட்ட விவகாரங்கள் குறித்து இன்றைய அமைச்சரவைக் கூட்டத்தில் ஆலோசிக்கப்பட்டதாக கூறப்படுகிறது.இதையடுத்து, தேர்தல் வாக்குறுதிகள் உள்ளிட்ட பல்வேறு துறைகளின் சார்பில் அறிவிக்கப்பட்டுள்ள 436 திட்டங்களைச் செயல்படுத்துவதற்கான நடவடிக்கைகள் குறித்தும், இக்கூட்டத்தில் விவாதிக்கப்பட்டது. தமிழ்நாட்டில் தற்போது நடைமுறையில் உள்ள 69 சதவீத இடஒதுக்கீட்டை பாதுகாப்பதற்கான சமூகநீதி கணக்கெடுப்பு நடத்துவதற்கு ஆணையம் அமைப்பது தொடர்பாக தமிழக அமைச்சரவைக் கூட்டத்தில் ஒப்புதல் அளிக்கப்பட்டது.தமிழ்நாட்டின் வளர்ச்சியை முன்னெடுத்துச் செல்லும் வகையில், ஒவ்வொரு துறையும் எட்ட வேண்டிய இலக்குகள், எதிர்காலத்தில் செயல்படுத்த வேண்டிய தொலைநோக்குத் திட்டங்கள் மற்றும் ஏற்கெனவே நடைமுறையில் உள்ள திட்டங்களின் முன்னேற்றம் குறித்தும் ஆலோசிக்கப்பட்டது.பட்டியலினத்தைச் சேர்ந்த ஒருவர் கிறிஸ்தவத்திற்கோ அல்லது இஸ்லாமிற்கோ மதம் மாறினால் இடஒதுக்கீடு கோர முடியாது என்ற உச்சநீதிமன்ற தீர்ப்புக்கு எதிராக தமிழக அரசு சார்பில் சீராய்வு மனு தாக்கல் செய்ய முடிவெடுக்கப்பட்டுள்ளது.மேலும் மாவட்ட அமைச்சர்களுக்கு முதல்வர் விஜய் அறிவுறுத்தல்களை வழங்கியுள்ளார். மக்களின் தேவையறிந்து செயல்படவும் அவர்களின் மனுக்களின் மீது நடவடிக்கை எடுக்கவும் உத்தரவிட்டுள்ளார் என தெரிகிறது