NEW அன்பில் மகேஸ் வழக்கில் திடீர் திருப்பம்.. தொழில்முனைவோர் சண்முகப்பிரியா வீட்டில் திடீர் ரெய்டு

தனியார் பள்ளிகளுக்கு அரசு அங்கீகாரம் பெற்றுத் தருவதாகக் கூறி பல கோடி ரூபாய் வசூலித்த வழக்கில் திமுக முன்னாள் அமைச்சர் அன்பில் மகேஸ் கைது செய்யப்பட்டுள்ள நிலையில், இந்த வழக்கில் சென்னை மத்திய குற்றப்பிரிவு (CCB) போலீசார் அடுத்தகட்ட அதிரடி நடவடிக்கையைத் தொடங்கியுள்ளனர். இந்த வழக்கின் விசாரணை வளையத்திற்குள் தற்போது ஒரு பெண் தொழில்முனைவோரைக் கொண்டு வந்துள்ளது பெரும் பரபரப்பை ஏற்படுத்தியுள்ளது. சென்னை மத்திய குற்றப்பிரிவு போலீஸ் தரப்பில் கிடைத்த தகவலின்படி, துணிக்கடை நடத்தி வரும் சண்முகப்பிரியா என்பவருக்கும், முன்னாள் அமைச்சர் அன்பில் மகேஸுக்கும் இடையேயான தொடர்பு குறித்து அதிகாரிகள் தீவிரமாக ஆராய்ந்து வருகின்றனர்.பள்ளிகளிடம் இருந்து சட்டவிரோதமாகப் பெறப்பட்டதாகக் கூறப்படும் பல கோடி ரூபாய் நிதி, வேறு தொழில்களில் முதலீடு செய்யப்பட்டதா அல்லது வேறு நபர்களின் பெயர்களில் பரிமாற்றம் செய்யப்பட்டதா என்ற கோணத்தில் போலீசார் விசாரணையை முன்னெடுத்துள்ளனர். இதில் சண்முகப்பிரியாவுக்கு உள்ள தொடர்பு என்ன என்பது குறித்து துப்பு துலக்கப்பட்டு வருகிறது.இந்தத் தகவலின் அடிப்படையில், சண்முகப்பிரியாவுக்குச் சொந்தமான இடங்களில் மத்திய குற்றப்பிரிவு போலீசார் அதிரடி சோதனையில் இறங்கியுள்ளனர்சென்னை பெருங்குடியில் உள்ள சண்முகப்பிரியாவின் வீட்டில் சிறப்பு தனிப்படை போலீசார் தீவிர சோதனை மேற்கொண்டு வருகின்றனர். அங்குள்ள முக்கிய ஆவணங்கள், வங்கி கணக்குப் புத்தகங்கள் மற்றும் சொத்து தொடர்பான விவரங்கள் சரிபார்க்கப்பட்டு வருகின்றன. சண்முகப்பிரியா தற்போது தங்கியிருந்து வசித்து வரும் நீலாங்கரை வீட்டிற்கும் விசாரணை அதிகாரிகள் நேரடியாகச் சென்று கள ஆய்வையும் சோதனையையும் நடத்தியுள்ளனர்.இந்த இரு இடங்களிலும் நடத்தப்பட்டு வரும் சோதனைகளில் முக்கிய பணப் பரிவர்த்தனை ஆவணங்கள், டிஜிட்டல் பதிவுகள் மற்றும் வங்கிப் பரிமாற்ற விவரங்கள் அதிகாரிகளின் ஆய்வுக்கு உட்படுத்தப்பட்டு வருகின்றன.அன்பில் மகேஸ் கைதைத் தொடர்ந்து, தற்போது பெண் தொழில்முனைவோர் ஒருவரின் வீடு மற்றும் அலுவலகங்கள் சோதனைக் குறியாகியிருப்பது, இவ்வழக்கை அடுத்தகட்ட சட்டப் போராட்டத்திற்கு எடுத்துச் சென்றுள்ளது