நீலகிரிக்கு வரும் சுற்றுலாப் பயணிகள் இயற்கை காட்சிகள் மற்றும் காலநிலையை அனுபவிப்பதோடு அதிகமாக மலைப்பகுதிகளில் வனவிலங்குகளை கண்டு ரசிப்பதையே விரும்புகின்றனர். அதற்காகவே அதிக அளவில் சுற்றுலா பயணிகள் முதுமலை வனப்பகுதிகளுக்கு வருகை புரிந்து தெப்பக்காடு யானைகள் முகாம் மற்றும் புலிகள் சரணாலயத்தை காட்சியிடுகின்றனர். முதுமலை வனப்பகுதிகளில் சபாரி வாகனங்கள் மூலமாக வன சாலைகளில் கட்டணங்கள் அடிப்படையில் சுற்றி காண்பிக்கப்படுகிறது. அவ்வாறு செல்லும் பொழுது மான் கூட்டங்கள் மற்றும் காட்டு யானை காட்டு மாடு ஆகியவற்றை கண்டாலும் அரிதாக புலி அவ்வப்போது கண்களுக்கு தென்படும். அந்த வகையில் நேற்று  காலை நேரத்தில் சபாரி வாகனங்கள் மூலமாக சுற்றுலா பயணிகளை ஏற்றுக் கொண்டு மாயாறு மசனகுடி சாலையில் சபாரி ஜீப்பு வாகனங்கள் சென்று கொண்டிருக்கும் பொழுது கம்பீரமாக புலி சாலையை கடக்கும் காட்சிகள் சுற்றுலா பயணிகளை பரவசப்படுத்தி உள்ளது. மெதுவாக வனப்பகுதியில் இருந்து வெளியே வந்து கம்பீரமான தோற்றத்துடன் வீர நடை போட்டு சாலையை மெதுவாக கடந்து செல்லும் புலியின் காட்சிகள் சுற்றுலா பயணிகளை பரவசத்தில் ஆழ்த்தியுள்ளது. புலியை கண்ட சுற்றுலா பயணிகள் வீடியோ பதிவு செய்து அவர்களது மகிழ்ச்சியையும் வெளிப்படுத்தி உள்ளனர்.