சிவகங்கை அருகே வடமாடு மஞ்சுவிரட்டு நிகழ்ச்சியில் பங்கேற்க வந்த சுள்ளான் மதன் என்பவர் வெட்டிப் படுகொலை செய்யப்பட்ட வழக்கில், முக்கியக் குற்றவாளியாகக் கருதப்படும் மிதுன் மாணிக்கத்தைப் போலீசார் கைது செய்து விசாரணை நடத்தி வருகின்றனர். இந்த வழக்கில் இதுவரை 9 பேர் கைது செய்யப்பட்டுள்ளதாகத் தகவல் வெளியாகியுள்ளது.சிவகங்கை மாவட்டம், மேலமங்கலத்தில் கடந்த 18ஆம் தேதி வடமாடு மஞ்சுவிரட்டு நிகழ்ச்சி நடைபெற்றது. இதில் பங்கேற்பதற்காகத் தனது மாட்டுடன் வந்த சுள்ளான் மதனை, அங்கு வந்த ஒரு கும்பல் சரமாரியாக வெட்டித் தாக்கியது. உயிரைக் காப்பாற்றிக்கொள்ள அருகிலிருந்த கரும்புத் தோட்டத்திற்குள் ஓடிய அவரை, அந்தக் கும்பல் விரட்டிச் சென்று வெட்டிப் படுகொலை செய்தது. இந்தச் சம்பவம் அப்பகுதியில் பெரும் அதிர்ச்சியை ஏற்படுத்தியது. இதையடுத்து, சிவகங்கை மாவட்டக் காவல் கண்காணிப்பாளர் அபிஷேக் குப்தா உத்தரவின்பேரில், குற்றவாளிகளைப் பிடிக்க ஆறு தனிப்படைகள் அமைக்கப்பட்டன. தனிப்படை போலீசார் தீவிர விசாரணை மேற்கொண்டு வந்த நிலையில், இந்தக் கொலை வழக்கில் அடுத்தடுத்து கைது நடவடிக்கைகள் மேற்கொள்ளப்பட்டன.கொலைச் சம்பவம் நடைபெற்ற மறுநாளே பாலமுருகன், பிரதீப், பாபு ஆகிய மூன்று பேரைப் போலீசார் கைது செய்தனர். தொடர்ந்து, சிவகங்கையைச் சேர்ந்த சந்தோஷ், ஜெயமாணிக்கராஜ், முத்துசூர்யா ஆகிய மூவரையும், மதுரையைச் சேர்ந்த விக்னேஷ் என்பவரையும் நேற்று இரவு கைது செய்தனர். இந்நிலையில், இந்தக் கொலை வழக்கில் முக்கியக் குற்றவாளியாகக் கருதப்படும் மிதுன் மாணிக்கத்தைப் போலீசார் இன்று கைது செய்து விசாரணை நடத்தி வருகின்றனர். அவருடன் தொடர்புடையதாகக் கூறப்படும் அஜித்குமார் என்ற இளைஞரையும் போலீசார் கைது செய்து விசாரித்து வருகின்றனர். இதன் மூலம், இந்த வழக்கில் கைது செய்யப்பட்டவர்களின் எண்ணிக்கை 9 ஆக உயர்ந்துள்ளதாகத் தெரிவிக்கப்பட்டுள்ளது.போலீசாரின் முதற்கட்ட விசாரணையில், சமூக வலைதளங்களில் ஒருவரையொருவர் மிரட்டும் வகையில் பதிவுகள் வெளியிட்டது தொடர்பாக இரு தரப்பினருக்கும் இடையே முன்விரோதம் ஏற்பட்டிருக்கலாம் எனத் தெரியவந்துள்ளதாகக் கூறப்படுகிறது. குறிப்பாக, இன்ஸ்டாகிராம் உள்ளிட்ட சமூக வலைதளங்களில் வெளியிடப்பட்ட பதிவுகள் மற்றும் மிரட்டல்கள் இந்தக் கொலைக்குக் காரணமாக இருந்திருக்கலாம் என்ற கோணத்தில் விசாரணை நடைபெற்று வருகிறது. இதற்கிடையே, கொலைச் சம்பவம் தொடர்பாகச் சமூக நல்லிணக்கத்தைப் பாதிக்கும் வகையிலும், ஆத்திரமூட்டும் வகையிலும் கருத்துகளைப் பதிவிடுவோர் மீது போலீசார் கண்காணிப்பைத் தீவிரப்படுத்தியுள்ளனர். சைபர் கிரைம் போலீசாரும் சமூக வலைதளப் பதிவுகளை ஆய்வு செய்து, விதிமீறல்களில் ஈடுபடும் கணக்குகளை முடக்குவதற்கான நடவடிக்கைகளில் ஈடுபட்டு வருகின்றனர்.சிவகங்கை மாவட்டத்தில் தொடர்ந்து நடைபெற்று வரும் கொலைச் சம்பவங்கள் பொதுமக்களிடையே அச்சத்தையும் அதிர்ச்சியையும் ஏற்படுத்தியுள்ளன. குற்றச் செயல்களில் ஈடுபடுவோர் மீது காவல்துறை கடும் நடவடிக்கை எடுத்து, இதுபோன்ற சம்பவங்கள் மீண்டும் நடைபெறாமல் தடுக்க வேண்டும் எனப் பொதுமக்கள் கோரிக்கை விடுத்துள்ளனர். கைது செய்யப்பட்டவர்களில் சிலர் ஏற்கெனவே பல்வேறு குற்ற வழக்குகளில் தொடர்புடையவர்களாக இருப்பதாகக் கூறப்படும் நிலையில், மாவட்டத்தில் சட்டம் ஒழுங்கைப் பாதுகாக்கவும், தொடர் குற்றச் சம்பவங்களைக் கட்டுப்படுத்தவும் காவல்துறை உரிய நடவடிக்கை எடுக்க வேண்டும் என்பதே சிவகங்கை மக்களின் எதிர்பார்ப்பாக உள்ளது