ஶ்ரீலங்கா வடக்கு மாகாணம், வவுனியாவைச் சேர்ந்த வனிதா சேனாதிராஜா ஆங்கில ஆசிரியராக கல்விப் பணியில் ஈடுபட்டு வந்தவர். 

விசேட காணி மத்தியஸ்த சபை மத்தியஸ்தராக, சமூகப் பிரச்சினைகளுக்கு தீர்வு காணும் பணியில் ஈடுபட்டவர்.

புதிய அலை கலை வட்டத்தின் மகளிர் அணியில் சமூகத்தோடு பயணித்தவர்.

“கற்றதும் பெற்றதும்” அமைப்பின் இயக்குநராக, அறிவையும் அனுபவத்தையும் அடுத்த தலைமுறைக்கு எடுத்துச் செல்ல முயன்றவர் .

இறம்பைக்குளம் மகளிர் மகா வித்தியாலய பழைய மாணவர் சங்க உறுப்பினராக, தான் பயின்ற கல்வி நிறுவனத்துடனான உறவைத் தொடர்ந்து பேணியவர். இவ்வாறாக பொறுப்புணர்வுடன் செயல்பட்டு வந்த சமூக, கலாசார மற்றும் அரசியல் செயல்பாட்டாளர் வனிதா சேனாதிராஜாவின் மரணம் அவரது குடும்பத்தினர், நண்பர்கள் மற்றும் சமூக ஆர்வலர்கள் மத்தியில் பலத்த சந்தேகங்களை எழுப்பியுள்ளதுடன், இது குறித்து முறையான சுயாதீன விசாரணை நடத்தப்பட வேண்டும் என்றும் கோரிக்கை விடுக்கப்பட்டுள்ளது.

வவுனியாவில் ஆசிரியையாகப் பணியாற்றியவர் மின்னேரியா பகுதியில் உள்ள விடுதி ஒன்றில் செப்டம்பர் 23 அன்று சடலமாக மீட்கப்பட்டார். இச்சம்பவம் தொடர்பாக  போலீசார் விசாரணைகளை மேற்கொண்டு வருகின்றனர்.

உடற்கூறாய்வுப் பரிசோதனைக்காக உடற்கூறுகள் அனுப்பப்பட்டுள்ளதுடன், மருத்துவ மற்றும் தடயவியல் சான்றுகளின் அடிப்படையில் அடுத்தகட்ட விசாரணைகள் முன்னெடுக்கப்படும் என எதிர்பார்க்கப்படுகிறது.

நூவரெலியா பகுதியில் நடைபெறும் பயிற்சிப் பட்டறை ஒன்றில் கலந்துகொள்ளப் போவதாகக் குடும்பத்தினரிடம் கூறிச் சென்றவர், எவ்வாறு மின்னேரியாவில் உள்ள விடுதிக்குச் சென்றார் என்ற கேள்வி உறவினர்களாலும் சக ஆர்வலர்களாலும் எழுப்பப்பட்டுள்ளது.

மேலும், போலீசாரால் கைப்பற்றப்பட்டதாகக் கூறப்படும் 3 பக்கங்கள் கொண்ட கடிதம் குறித்தும் கேள்விகள் எழுந்துள்ளன. 

எனவே, ஆரம்பக்கட்ட சந்தேகங்களை மட்டும் அடிப்படையாகக் கொள்ளாமல், அனைத்து சாத்தியக்கூறுகளையும் போலீசார் தீவிரமாக ஆராய வேண்டும் என கோரப்பட்டுள்ளது.

அவர் பயணித்த வழித்தடங்கள், விடுதி மற்றும் அதனைச் சுற்றியுள்ள பகுதிகளின் சிசிடிவி (CCTV) காணொளிகள், அறையிலிருந்து பெறப்பட்ட கைரேகைகள், மொபைல் போன் மற்றும் மடிக்கணினி தரவுகள், உடற்கூறாய்வு அறிக்கைகள் மற்றும் கடைசியாக அவருடன் தொடர்பில் இருந்தவர்களின் வாக்குமூலங்கள் ஆகியவை முழுமையாகப் பரிசீலிக்கப்பட வேண்டும் என உறவினர்களும் சமூக ஆர்வலர்களும் கேட்டுக்கொண்டுள்ளனர்.