திருப்பத்தூர் மாவட்டம், ஆம்பூர் அடுத்த மாராப்பட்டு மற்றும் அதனைச் சுற்றியுள்ள கிராமங்களைச் சேர்ந்த பொதுமக்கள், தங்கள் பகுதியில் மேம்பாலம் அமைத்துத் தரக் கோரி மாவட்ட ஆட்சியர் அலுவலகத்தில் நடைபெற்ற மக்கள் குறைதீர்வு கூட்டத்தில் மனு அளித்தனர்.மேலும் அந்த மனுவில் தெரிவித்துள்ளதாவது, ஆம்பூர் அடுத்த மாராப்பட்டு கிராமப் பகுதியில் தேசிய நெடுஞ்சாலையைக் கடக்கும் இடத்தில், எதிரே வரும் வாகனங்கள் தெரிவதற்குச் சிரமமான ஆபத்தான வளைவு உள்ளது. இதனால், அப்பகுதியில் சாலையைக் கடக்கும் பொதுமக்கள் அடிக்கடி விபத்து அபாயத்தை எதிர்கொண்டு வருகின்றனர்.மேலும் மாராப்பட்டு மற்றும் அதனைச் சுற்றியுள்ள 10க்கும் மேற்பட்ட கிராமங்களைச் சேர்ந்த பொதுமக்கள், விவசாயிகள் உள்ளிட்டோர் தங்களின் அன்றாடத் தேவைகளுக்காகவும் போக்குவரத்திற்காகவும் இந்தச் சாலையைப் பயன்படுத்தி வருகின்றனர். மேலும், அருகிலுள்ள கிராமங்களில் மூன்று முதல் நான்கு பள்ளிகள் செயல்பட்டு வருகின்றன.

மேலும் இப்பள்ளிகளில் பயிலும் ஆயிரத்துக்கும் மேற்பட்ட மாணவ, மாணவிகள் மற்றும் ஆசிரியர்கள் தினமும் இந்த ஆபத்தான சாலையைக் கடந்து செல்ல வேண்டிய நிலை உள்ளது.பின்பு குறிப்பாக, பாலாற்றில் வெள்ளப்பெருக்கு ஏற்படும் காலங்களில் பொதுமக்கள் போக்குவரத்திற்காகப் பாலாற்றுப் பாலத்தின் வழியாக தேசிய நெடுஞ்சாலையைக் கடந்து செல்ல வேண்டிய சூழல் ஏற்படுகிறது. மேலும், சாலையில் உள்ள ஆபத்தான வளைவு காரணமாகத் தொடர்ந்து விபத்துகள் ஏற்பட்டு உயிரிழப்புகளும், கடுமையான காயங்களும் ஏற்படுவதாகப் பொதுமக்கள் வேதனை தெரிவிக்கின்றனர்.எனவே, பொதுமக்கள் மற்றும் பள்ளி மாணவர்களின் பாதுகாப்பைக் கருத்தில் கொண்டு, மாராப்பட்டு கிராமத்தின் மையப் பகுதியில் மேம்பாலம் அமைக்க வேண்டும். கிராமத்திலிருந்து தொலைவான வேறு பகுதியில் மேம்பாலம் அமைக்கப்பட்டால், பொதுமக்கள் நீண்ட தூரம் பயணித்து மீண்டும் சாலையைக் கடக்க வேண்டிய நிலை ஏற்படும். எனவே, திட்ட வரைபடத்தில் உரிய மாற்றங்களைச் செய்து, தங்கள் கிராமத்தின் மையப் பகுதியில் மேம்பாலம் அமைக்க மாவட்ட நிர்வாகம் நடவடிக்கை எடுக்க வேண்டும் என மனுவில் வலியுறுத்தியுள்ளனர்