2026-ஆம் ஆண்டுக்கான பொருளாதாரத்துக்கான நோபல் பரிசு இருவருக்கு பகிர்ந்து அறிவிக்கப்பட்டுள்ளது.மருத்துவம், இயற்பியல், வேதியியல், பொருளாதாரம், அமைதி, இலக்கியம் ஆகிய துறைகளில் சாதனை படைத்தவர்களுக்கு ஒவ்வொரு ஆண்டும் நோபல் பரிசு வழங்கப்பட்டு வருகிறது.அமைதிக்கான நோபல் பரிசு நார்வேயிலும், பிற துறைகளுக்கான நோபல் பரிசு ஸ்வீடன் தலைநகர் ஸ்டோக்ஹோமிலும் அறிவிக்கப்படுகிறது.ஏற்கெனவே, இந்தாண்டிற்கான மருத்துவம், வேதியியல், இயற்பியல், அமைதி மற்றும் இலக்கியத்திற்கான நோபல் பரிசுகள் அறிவிக்கப்பட்டுள்ளன.இந்நிலையில், இன்று பொருளாதாரத்திற்கான நோபல் பரிசு பொருளாதார நிலைப்படுத்துதல் குறித்த ஆராய்ச்சிக்காக அமெரிக்காவின் ஸ்டான்ஃபோர்ட் பல்கலைக்கழகத்தைச் சேர்ந்த ராபர்ட் ஈ.ஹால் மற்றும் கொலம்பியா பல்கலைக்கழகத்தைச் சேர்ந்த மைக்கேல் வுட்ஃபோர்ட் ஆகியோருக்கு  அறிவிக்கப்பட்டுள்ளது.இதுகுறித்து ராயல் ஸ்வீடிஷ் அறிவியல் அகாடமி வெளியிட்ட அறிக்கையில், ’இந்த ஆண்டு பொருளாதார அறிவியலுக்கான நோபல் பரிசு பெறுபவர்களான ராபர்ட் ஈ.ஹால் மற்றும் மைக்கேல் வுட்ஃபோர்ட் ஆகியோர் நிலைப்படுத்தல் கொள்கையைச் செயல்படுத்தும் திறனை மேம்படுத்திய புதிய பேரியல் பொருளாதார மாதிரிகளை உருவாக்கியுள்ளனர். இந்த மாதிரிகளின் அடிப்படையில், சரியான நேரத்தில் எடுக்கப்படும் நிதி மற்றும் பணவியல் கொள்கை நடவடிக்கைகள், பொருளாதாரத்தின் ஏற்ற இறக்கங்களைக் குறைக்க முடியும்’ என்று தெரிவிக்கப்பட்டுள்ளது.ராபர்ட் ஈ.ஹால் 1943ம் ஆண்டு அமெரிக்காவின் பாலோ ஆல்டோவில் பிறந்தார். அவர் ஸ்டான்ஃபோர்ட் பல்கலைக்கழகத்தில் பேராசிரியராக உள்ளார். மைக்கேல் வுட்ஃபோர்ட் 1955ம் ஆண்டு அமெரிக்காவின் சிக்கோபியில் பிறந்தார். அவர் கொலம்பியா பல்கலைக்கழகத்தில் பேராசிரியராக உள்ளார்.பொருளாதாரங்கள் மாற்றங்களின்போது எவ்வாறு செயல்படுகின்றன என்பதையும், கொள்கை வகுப்பாளர்கள் எவ்வாறு அதிக நிலைத்தன்மையை நோக்கிச் செயல்பட முடியும் என்பதையும் விளக்க உதவும் பொருளாதாரக் கோட்பாடுகள் குறித்த இவர்களின் ஆராய்ச்சிக்காக நோபல் பரிசு வழங்கப்பட்டதாக ராயல் ஸ்வீடிஷ் அறிவியல் அகாடமி தெரிவித்துள்ளது