கிருஷ்ணகிரி மாவட்டம், மத்தூர் ஒன்றியம், சிவம்பட்டி கிராமத்தைச் சேர்ந்த விவசாயி முருகன், இயற்கை முறையில் நிலக்கடலை சாகுபடி செய்து சிறப்பான விளைச்சலைப் பெற்றுள்ளார். அவரது நிலத்தில் ஒரு செடிக்கு 70 முதல் 100 காய்கள் வரை விளைந்துள்ளன.

கடந்த 5 ஆண்டுகளாக இயற்கை விவசாயத்தில் ஈடுபட்டு வரும் விவசாயி முருகன், தனது நிலத்தில் மானாவாரி முறையில் நிலக்கடலை சாகுபடி செய்துள்ளார். பயிர்களுக்கு 3 முதல் 4 முறை மட்டுமே தண்ணீர் பாய்ச்சியதுடன், இரண்டு முறை மீன் அமிலம் உள்ளிட்ட இயற்கை இடுபொருட்களையும் பயன்படுத்தியுள்ளார்.

குறைந்த செலவில் மேற்கொள்ளப்பட்ட இந்த இயற்கை சாகுபடி முறையின் மூலம், ஒவ்வொரு செடியிலும் குறைந்தபட்சம் 70 முதல் அதிகபட்சம் 100 காய்கள் வரை திரட்சியாகவும் தரமாகவும் விளைந்துள்ளன.

இதுகுறித்து மத்தூர் பாரம்பரிய இயற்கை விவசாய பெண்கள் உற்பத்தியாளர்கள் நிறுவனம் அமைப்பாளர் கிரிஜா கூறியதாவது:

“இன்றைய மற்றும் நாளைய தலைமுறையினருக்கு நஞ்சில்லா உணவை கொண்டு சேர்ப்பதும், குறைந்தது 500 விவசாயிகளையாவது இயற்கை விவசாயத்திற்கு மாற்றுவதும் எங்கள் அமைப்பின் முக்கிய நோக்கமாகும்.

ரசாயன உரங்களை பயன்படுத்துவதைவிட, மீன் அமிலம், பஞ்சகாவ்யா போன்ற இயற்கை இடுபொருட்களை பயன்படுத்துவதன் மூலம் சாகுபடி செலவை வெகுவாக குறைக்க முடியும்.

ஆரம்ப கட்டத்தில் நிலத்தின் வளத்தை மீட்டெடுக்க சுமார் ஓராண்டு காலம் தேவைப்பட்டாலும், மண் வளம் மேம்பட்டு உயிர்ப்புடன் மாறிய பின்னர் இதுபோன்ற சிறப்பான மகசூலை பெற முடியும்.

விவசாயி முருகனின் இந்த வெற்றியை முன்மாதிரியாகக் கொண்டு, சுற்றுவட்டார விவசாயிகள் அனைவரும் நஞ்சில்லா இயற்கை விவசாயத்திற்கு மாற வேண்டும்” என்றார்.

குறைந்த செலவில் அதிக விளைச்சலை பெற்றுள்ள விவசாயி முருகனின் இயற்கை சாகுபடி முறை, அப்பகுதி விவசாயிகளிடையே நல்ல வரவேற்பைப் பெற்றுள்ளது.