மதுராந்தகம் மற்றும்  தாராபுரம் சட்டமன்றத் தொகுதி இடைத்தேர்தல் முடிவுகள் வெளியாகிவிட்டன. இந்தத் தேர்தலில் ஆளும் தமிழக வெற்றிக் கழகம் இரண்டு இடங்களிலும் வெற்றி பெற்றிருந்தாலும், ஒட்டுமொத்த அரசியல் களத்தின் பார்வையும் இப்போது திமுக பக்கம் திரும்பியுள்ளது. காரணம், எந்தக் கூட்டணியும் இல்லாமல் தனித்துக் களமிறங்கிய திமுக, அதிமுகவின் கோட்டை என்று சொல்லப்பட்ட இரண்டு தொகுதிகளிலுமே சுமார் 32% வாக்குகளை அள்ளி 2வது இடத்தைப் பிடித்து அசத்தியுள்ளது. பிரதான அதிமுகவை 3வது இடத்திற்குத் தள்ளி திமுக படைத்துள்ள இந்த சாதனைக்குப் பின்னால் உதயநிதி ஸ்டாலினின் அதிரடி வியூகமே உள்ளது.இந்த இடைத்தேர்தல் அறிவிக்கப்பட்டபோது, "ஆளும் கட்சிக்கு சாதகமாக இருக்கும் தேர்தல், இதில் திமுக போட்டியிட வேண்டுமா?" என்ற தயக்கம் பல மட்டங்களில் இருந்தது. ஆனால், களத்தில் இறங்கிப் பார்க்க வேண்டும் என்று மிக உறுதியாக நின்றவர் உதயநிதி ஸ்டாலின். தேர்தலைப் புறக்கணித்தால் மக்கள் மத்தியில் தப்பான செய்தி போகும் என்பதை உணர்ந்து, துணிச்சலாக திமுக களத்தில் நிற்க வேண்டும் என்று தலைமைக்கு அழுத்தம் கொடுத்து முடிவெடுத்தார். தாராபுரத்தில் எஸ்.சுகன்யா, மதுராந்தகத்தில் இ.பரந்தாமன் என களத்தில் மக்களுடன் தொடர்பில் உள்ள திறமையான வேட்பாளர்களை அவரே தேர்வு செய்தார்.களத்தில் இறங்கி சுட்டெரிக்கும் வெயிலையும் பொருட்படுத்தாமல் வீதி வீதியாகச் சென்று மக்களிடம் பிரச்சாரம் செய்தார். ஆளும் கட்சியின் பலம் ஒருபுறம், அதிமுகவின் பாரம்பரிய வாக்கு வங்கி மறுபுறம் இருந்தாலும், திமுகவின் பலத்தை மக்களிடம் நேரடியாகக் கொண்டு சேர்த்தார். திமுக வெற்றிபெறவில்லை என்றாலும், இந்த தேர்தல் முடிவு அக்கட்சிக்கு மிகப்பெரிய அரசியல் வெற்றியாகவே பார்க்கப்படுகிறது.  தாராபுரம் மற்றும் மதுராந்தகம் இரண்டுமே கடந்த தேர்தலில் அதிமுக வென்ற தொகுதிகள். குறிப்பாக கொங்கு மண்டலத்தில் எடப்பாடி பழனிசாமியின் செல்வாக்கை உடைத்து, அதிமுகவை 3வது இடத்திற்குத் தள்ளியது எளிய காரியம் அல்ல. எந்த ஒரு கூட்டணிக் கட்சியும் இல்லாமல் தனித்து நின்று இரு தொகுதிகளிலுமே 32% வாக்குகளைத் தக்கவைத்திருப்பது சாதாரண விஷயம் அல்ல. திமுகவின் வாக்கு வங்கி எந்தச் சூழலிலும் சிதையாமல் அப்படியே பாறாங்கல் போல உறுதியாக இருப்பதை இது காட்டுகிறது. ஒருவேளை திமுக இந்தத் தேர்தலில் போட்டியிடாமல் ஒதுங்கி இருந்தால், "கூட்டணி தயவு இல்லாமல் திமுகவால் தனித்து நிற்க முடியாது" என்று எதிர்க்கட்சிகள் எளிதாகப் பிரச்சாரம் செய்திருக்கும். அந்த அவப்பெயரை உதயநிதியின் துணிச்சலான முடிவு ஒரே அடியில் தகர்த்துவிட்டது. ஆளும் தவெக அதிகார பலத்துடன் நின்று வெற்றிபெற்றிருந்தாலும், எதிர்க்கட்சிகளில் உண்மையான மக்கள் செல்வாக்கு யாரிடம் இருக்கிறது என்ற கேள்விக்கு இந்தத் தேர்தல் தெளிவான பதிலை அளித்துள்ளது. எடப்பாடி பழனிசாமியின் இரட்டை இலை சின்னத்தை மக்கள் புறந்தள்ளி, உண்மையான மாற்று சக்தியாகவும் மக்களின் குரலாகவும் திமுகவையே பார்க்கிறார்கள் என்பது இந்த 50 ஆயிரத்திற்கும் மேற்பட்ட வாக்குகளில் அப்பட்டமாகத் தெரிகிறது. சட்டமன்றத்தில் தவெகவின் பலம் 109 ஆக உயர்ந்திருக்கலாம், ஆனால் களத்தில் திமுகவின் 59 எம்.எல்.ஏ-க்களின் குரல் இப்போதும் மக்களின் குரலாகவே ஒலிக்கிறது. துணிச்சலாக முடிவெடுத்து, சரியான ஆட்களைக் களமிறக்கி, கடைசி வரை போராடிய உதயநிதி ஸ்டாலினின் தலைமைக்கு இந்த இடைத்தேர்தல் முடிவுகள் மிகப்பெரிய அங்கீகாரத்தைத் தந்துள்ளன. சவாலான நேரத்தில் தைரியமாக களத்தில் இறங்கி நின்றால் மக்கள் நிச்சயமாகக் கைவிட மாட்டார்கள் என்பதற்கு தாராபுரம் மற்றும் மதுராந்தகம் இடைத்தேர்தல் முடிவுகளே மிகச் சிறந்த சான்று