திருவண்ணாமலை மாவட்ட ஆட்சித்தலைவர் வ‌ந்தனா கார்க்  திருவண்ணாமலை காமாட்சி அம்மன் கோவில் அருகில் உள்ள கோ - ஆப்டெக்ஸ் விற்பனை நிலையத்தில் தீபாவளி - 2026 சிறப்பு தள்ளுபடி விற்பனையை குத்துவிளக்கேற்றி துவக்கி வைத்து கைத்தறி சேலை ரகங்களை பார்வையிட்டார்.

கோ-ஆப்டெக்ஸ் என அனைவராலும் அழைக்கப்படும் தமிழ்நாடு கைத்தறி நெசவாளர் கூட்டுறவு சங்கம் 1935 ஆம் ஆண்டில் துவக்கப்பட்டு தொடர்ந்து 91 ஆண்டுகளாக வாடிக்கையாளர்களுக்கு சேவை புரிந்து வருகிறது. மேலும் வாடிக்கையாளர்களின் மாறிவரும் இரசனை மற்றும் அவர்களின் தேவைகளையறிந்து கைத்தறி இரகங்களை கோ-ஆப்டெக்ஸ் புத்தம் புதிய வடிவமைப்புகளில் உற்பத்தி செய்து விற்பனைக்கு வைக்கப்பட்டுள்ளது. 2025-26ம் ஆண்டில் சுமார் 21 கோடி அளவிற்கு வேலூர் மண்டலத்தில் சில்லறை விற்பனை மேற்கொள்ளப்பட்டது. கோ-ஆப்டெக்ஸ் வேலூர் மண்டலம் சென்ற ஆண்டு தீபாவளி பண்டிகையில் சுமார் ரூ.7.38 கோடி அளவிற்கு சில்லறை விற்பனை மேற்கொண்டது, இந்த வருட தீபாவளி 2026 இலக்காக ரூ.10 கோடி நிர்ணயிக்கப்பட்டுள்ளது. திருவண்ணாமலை விற்பனை நிலையம் கடந்த தீபாவளி 2025-ல் ரூ.87 இலட்சம் அளவிற்கு விற்பனை மேற்கொண்டது. இந்த ஆண்டு தீபாவளி 2026 இலக்காக ரூ.125 இலட்சம் நிர்ணயிக்கப்பட்டுள்ளது. இதன் மூலம் கைத்தறி நெசவாளர்களுக்கு தொடர்ந்து வேலை வாய்ப்பு வழங்கப்பட்டு வருகிறது.

கைத்தறி இரகங்களின் விற்பனையை அதிகரிக்க தமிழக அரசு ஆண்டு தோறும் பண்டிகை காலங்களில் 30% சிறப்பு தள்ளுபடி வழங்கி வருகிறது. வரும் தீபாவளி பண்டிகையை முன்னிட்டு அனைத்து பட்டு மற்றும் பருத்தி கைத்தறி இரகங்களுக்கு 30% சிறப்பு தள்ளுபடி இந்த ஆண்டும் வழங்கப்படுகிறது.

தீபாவளி பண்டிகையை முன்னிட்டு புதிய வண்ணங்களில் காஞ்சிபுரம், ஆரணி, திருபுவனம், சேலம்பட்டு சேலைகள், கோவை மற்றும் பழனி மென் பட்டு சேலைகள், கோவை, அருப்புக்கோட்டை, திண்டுக்கல், பரமக்குடி, மணமேடு, நெகமம், உறையூர், சேலம், காரைக்குடி, பருத்தி சேலைகள், திண்டுக்கல் ஆர்கானிக் சேலைகள், குர்தீஸ்கள், சுடிதார் இரகங்கள், ஆடவர்களுக்கான வேட்டிகள், ரெடிமேட் சட்டைகள், குர்தாக்கள், லுங்கிகள், போர்வைகள், துண்டுகள், கைக்குட்டைகள், திரைச்சீலைகள் போன்ற இரகங்கள் வாடிக்கையாளர்களின் வசதிக்கேற்ப காட்சிபடுத்தப்பட்டுள்ளது. இவ்வாண்டு புதிய வரவுகளாக ரிங்கிள் ஃப்ரி சட்டைகள், மகளிருக்கான நவீன ஆடைகள், சிறுமிகளுக்கான வண்ண பாவாடை சட்டைகள், மூங்கில் இழைகளால் நெய்யப்பட்ட துண்டுகள் என பல புதிய இரகங்கள் விற்பனைக்கு உள்ளன.

கோ-ஆப்டெக்ஸின் மாதந்திர சேமிப்பு திட்டம் ரூ.300/- முதல் தொடங்குகிறது. கோ-ஆப்டெக்ஸ் நிறுவனத்தின் ஆன்லைன் விற்பனை www.cooptex.gov.in என்ற இணைய தளத்தின் மூலமும் மேற்கொள்ளப்பட்டுவருகிறது.

தீபாவளி 2026 பண்டிகையை முன்னிட்டு 30% சிறப்பு தள்ளுபடியுடன் அரசு ஊழியர்களுக்கு வட்டியில்லா கடன் வசதி இந்த ஆண்டும் தொடர்ந்து வழங்கப்படுகிறது. அரசு ஊழியர்கள் கடன் விற்பனை வசதியை பயன்படுத்தி தங்க தங்களது குடும்பத்திற்கு தேவையான துணி இரகங்களைவாங்கி வரும் தீபாவளி பண்டிகையை மகிழ்ச்சியுடன் கொண்டாட கோ-ஆப்டெக்ஸ் அன்புடன் கேட்டுக்கொள்கிறது. மேலும் வாடிக்கையாளர்கள் பயன்பெறும் வகையில் அணைத்து விடுமுறை நாட்களிலும் விற்பனை நிலையம் செயல்படும்.

இவ்விழாவில் திருவண்ணாமலை வருவாய் கோட்டாட்சியர் செல்வம், மண்டல மேலாளர் ஸ்டாலின், கோ-ஆப்டெக்ஸ் மேலாளர் (வடிவமைப்பு மற்றும் உற்பத்தி) விஜயகுமார், இரக மேலாளர் பெருமாள், விற்பனை நிலைய மேலாளர் குமரவேல் மற்றும் திரளான வாடிக்கையாளர்கள் கலந்து கொண்டு சிறப்பித்தனர்.