நாகை மாவட்டம், கீழையூர் அருகே மேலவாழக்கரை ஊராட்சி ஏர்வைக்காடு பகுதியில் உள்ள வெள்ளையாறு பிரிவு காவிரிக்குண்டான் பாசன வாய்க்கால் கதவணையில் மேட்டூர் அணையில் இருந்து திறக்கப்பட்ட காவிரி நீர் வந்தடைந்தது. கதவணைக்கு வந்த காவிரி நீர், விவசாயப் பாசனத்திற்காக திறந்து விடப்பட்டது. தமிழக காவிரி விவசாயிகள் சங்க மாநில அமைப்பு செயலாளர் எஸ்.ஸ்ரீதர் மற்றும் கீழையூர் ஒன்றிய கடைமடை பாசன விவசாயிகள் சங்கத் தலைவர் என்.மணிவண்ணன் ஆகியோர் தலைமையில் விவசாயிகள் காவிரி நீருக்கு நெல்மணிகள் மற்றும் மலர்களைத் தூவி உற்சாகமாக வரவேற்பு அளித்தனர்.

தொடர்ந்து செய்தியாளர்களை சந்தித்த விவசாயிகள், வழக்கமாக மேட்டூர் அணை திறக்கப்பட்டதில் இருந்து ஒரு வார காலத்திற்குள் காவிரி நீர், காவிரியின் கடைமடைப் பகுதியான நாகை மாவட்டத்திற்கு வந்து சேரும். ஆனால், இந்த ஆண்டு மேட்டூர் அணை திறக்கப்பட்டு இரண்டு வாரங்கள் கடந்த நிலையில் தான் நாகை மாவட்டத்திற்கு காவிரி நீர் வந்து சேர்ந்துள்ளது. இதனால், சம்பா சாகுபடி பணிகளில் தாமதம் ஏற்படும் சூழல் உருவாகியுள்ளதாக விவசாயிகள் தெரிவித்தனர். எனவே, நாகை மாவட்டத்தின் கடைமடைப் பகுதிகளுக்கு போதுமான அளவு தண்ணீர் வந்து சேரும் வகையில், கூடுதலாக 15 ஆயிரம் முதல் 20 ஆயிரம் கன அடி வரை தண்ணீர் திறந்து விட வேண்டும் என அவர்கள் கோரிக்கை விடுத்துள்ளனர். மேலும், பொதுப்பணித்துறை அதிகாரிகள் தொடர்ந்து நீர்வரத்தை கண்காணித்து, பாசன வாய்க்கால்களின் கடைசி பகுதிகள் வரை முழுமையாக தண்ணீர் வந்து சேர்கிறதா?  என்பதை உறுதி செய்ய வேண்டும் என்றும் விவசாயிகள் வலியுறுத்தினர். தற்போது சாகுபடிக்காக 45 நாட்கள் மட்டுமே தண்ணீர் வழங்கப்படும் என தெரிவிக்கப்பட்டுள்ள நிலையில், ஒருபோக சம்பா சாகுபடியை பாதுகாக்கும் வகையில், விவசாயிகளின் தேவைக்கு ஏற்ப தண்ணீரை முறையாக பங்கிட்டு வழங்க வேண்டும் என்றும் கோரிக்கை விடுத்தனர். எர்வைக்காடு கதவணை மூலம் பாசன வசதி பெறும் சுமார் 28 ஆயிரம் ஏக்கர் விளைநிலங்களுக்கு இங்கிருந்து தண்ணீர் செல்கிறது. எனவே, இந்த கதவணைக்கு தொடர்ந்து போதுமான அளவு காவிரி நீர் வந்து சேருவதை அதிகாரிகள் உறுதி செய்ய வேண்டும் என்றும் விவசாயிகள் தெரிவித்தனர். காவிரி நீர் கடைமடைப் பகுதிகளுக்கு தாமதமாக வந்துள்ள நிலையில், சம்பா சாகுபடிக்கு தேவையான தண்ணீர் முழுமையாக கிடைக்குமா என்ற எதிர்பார்ப்பில் நாகை மாவட்ட விவசாயிகள் உள்ளனர்.