இடைத்தேர்தலில் படுதோல்வியை சந்தித்துள்ள அதிமுக தன்னை சுயபரிசோதனை செய்து கொள்ள வேண்டும் என பாமகவின் அன்புமணி தெரிவித்துள்ளார். இன்று (அக்டோபர் 10) கோவை விமான நிலையத்தில் செய்தியாளர்களைச் சந்தித்த பாமகவின் அன்புமணி ராமதாஸ் பேசுகையில், ''ஜனநாயக ரீதியில் இடைத்தேர்தல் நடைபெற்றுள்ளது. கடந்த கால இடைத்தேர்தல் எல்லாம் இடைத்தேர்தலாக இல்லாமல் எடைக்கு எடைக்கு பணம் பொருள் கொடுக்கும் தேர்தலாக இருந்தது. மக்களை ஆடுகள் மாடுகள் போல சந்தைகளில் அடைத்து வைத்து பணத்தை கொடுத்து, மதுவை கொடுத்து, உணவை கொடுத்து வாக்களித்து வெற்றி பெற்ற காட்சிகளை எல்லாம் நாம் பார்த்தோம். ஆனால் இன்று பணம் கொடுக்காமல் தமிழ்நாட்டில் உள்ள அனைத்து கட்சிகளும் ஜனநாயக ரீதியில் பிரச்சாரம் செய்து இடைத்தேர்தல் நடைபெற்றது.இந்த இடைத்தேர்தலில் ஆளும்கட்சி வெற்றி பெற்றிருக்கிறது. அதே வேளையில் இந்த இரண்டு தொகுதிகளில் ஐந்து மாதத்திற்கு முன்பு வெற்றிபெற்ற அதிமுக மூன்றாவது இடத்திற்கு தள்ளப்பட்டிருக்கிறது. இந்த இரண்டு வெற்றிகளும் ஆளும் கட்சிக்கு கூடுதல் பலம் சேர்க்கும். அதேவேளையில் சுதந்திர இந்தியாவில் அதிக நாட்கள் தமிழகத்தை ஆண்டது அதிமுக. இவர்கள் சுய பரிசோதனை செய்ய வேண்டும். நான் அவர்களை தவறாக சொல்லவில்லை நல்ல எண்ணத்தோடு தான் நான் சொல்கின்றேன். ஐந்து மாதத்திற்கு முன்பு வெற்றி பெற்ற கட்சி இன்று மூன்றாவது இடத்திற்கு சென்றுள்ளது. நான் சொல்வது நல்ல வகையான ஆலோசனை தான். தவறான எண்ணத்தில் நான் சொல்லவில்லை'' என்றார்