​மதர் சமூக சேவை நிறுவன இயக்குனரும், தமிழ்நாடு பனை பாதுகாப்பு மற்றும் தொழிலாளர் மேம்பாட்டு இயக்க மாநில தலைவருமான டாக்டர் எஸ்.ஜே. கென்னடியின் 30 ஆண்டுகால சமூக சேவையைப் பாராட்டி, மக்கள் மறுமலர்ச்சி தடம் அமைப்பின் சார்பில் "சிறந்த சமூக சேவைக்கான சாதனையாளர் விருது" வழங்கப்பட்டுள்ளது.

காயல்பட்டினம் துளிர்கள் அரங்கத்தில் மக்கள் மறுமலர்ச்சி தடம் அமைப்பின் சார்பில் விருது வழங்கும் விழா மற்றும் நாம் யார்?  என்ற  கருத்தரங்கு  நடைபெற்றது. நிகழ்ச்சிக்கு சமூக ஆர்வலர் பெ. தமிழ்ச்செல்வன் தலைமை தாங்கினார். கி.இசக்கிமுத்து வரவேற்றார். காயல் முருகேசன், வ.முன்னோடி தமிழன், கு. அம்பேத் ஆகியோர் முன்னிலை வகித்தனர். சொ.சு.தமிழினியன் நோக்க உரையாற்றினார். சிறப்பு விருந்தினராக மக்கள் மறுமலர்ச்சி தடம் அமைப்பின் நிறுவனரும், முதன்மை நிர்வாகியும், புற்றுநோய் அறுவை சிகிச்சை நிபுணருமான மருத்துவர் க.கோ.இராஜவர்தனன் கலந்து கொண்டு விருதுக்கு தேர்வு செய்யப்பட்டிருந்த மதர் சமூக சேவை நிறுவன இயக்குனரும், தமிழ்நாடு பனை பாதுகாப்பு மற்றும் தொழிலாளர் மேம்பாட்டு இயக்க மாநில தலைவரும் , மாவட்ட கிரீன் கமிட்டி உறுப்பினருமான டாக்டர் எஸ்.ஜே.கென்னடிக்கு சிறந்த சமூக சேவைக்காக சாதனையாளர் விருது வழங்கி  பாராட்டி வாழ்த்தினார். முடிவில் சு.முத்துராமன் நன்றி கூறினார்.தமிழ்நாட்டிலேயே முதன்முறையாக ஒரு கோடி பனைமர விதைகள் நடும் பணியைத் தொடங்கி, பனை பாதுகாப்பு மற்றும் அதன் பயன்கள் குறித்த விழிப்புணர்வை மக்களிடம் கொண்டு சேர்த்துள்ளார்.ஏழை, எளிய, ஆதரவற்றோரின் பொருளாதார வளர்ச்சி, குழந்தைகளின் கல்வி மற்றும் இளைஞர்களின் முன்னேற்றத்திற்காகப் பாடுபட்டு வருகிறார். இயற்கை சீற்றங்களை எதிர்கொள்ளுதல், நிலத்தடி நீர் மற்றும் நீர் நிலைகளைப் பாதுகாத்தல், மண் அரிப்பைத் தடுத்தல், பள்ளி மாணவர்களிடையே போதைப்பொருள் மற்றும் புகையிலை ஒழிப்பு விழிப்புணர்வை ஏற்படுத்துதல் உள்ளிட்டவைகளை மதர் டிரஸ்ட் இயக்குனர் கென்னடி கடந்த 30 ஆண்டுகளாக தொடர்ந்து சமூகப் பணிகளில் ஈடுபட்டு வருகிறார்