திருச்சி மலைக்கோட்டை உச்சிப்பிள்ளையார் மற்றும் மாணிக்க விநாயகர் கோயில்களில் விநாயகர் சதுர்த்தி விழா நேற்று சிறப்பாக தொடங்கியது. விழாவையொட்டி கோயில் யானை லட்சுமிக்கு கஜபூஜை நடத்தப்பட்டு, உச்சிப்பிள்ளையார் மற்றும் மாணிக்க விநாயகருக்கு சிறப்பு பூஜை, சந்தனக்காப்பு அலங்காரம் நடைபெற்றது.

விழாவின் முக்கிய நிகழ்வாக 150 கிலோ எடையிலான பிரம்மாண்ட கொழுக்கட்டை தயாரிக்கப்பட்டு, இரு விநாயகர் சன்னதிகளிலும் தலா 75 கிலோ வீதம் படையலிடப்பட்டது. பின்னர் கொழுக்கட்டை பிரசாதம் பக்தர்களுக்கு வழங்கப்பட்டது.

விநாயகர் சதுர்த்தியை முன்னிட்டு கோயில் படிகளில் வண்ணக் கோலங்கள், மலர் அலங்காரங்கள் மற்றும் வாழை மரங்களால் சிறப்பு அலங்காரம் செய்யப்பட்டிருந்தது. ஏராளமான பக்தர்கள் நீண்ட வரிசையில் காத்திருந்து சுவாமி தரிசனம் செய்தனர்.

மேலும், திருச்சி மாநகர் மற்றும் புறநகரில் 1,175 இடங்களில் விநாயகர் சிலைகள் பிரதிஷ்டை செய்யப்பட்டுள்ளன. சிலைகள் ஊர்வலமாக எடுத்துச் செல்லப்பட்டு காவிரி, கொள்ளிடம் உள்ளிட்ட நீர்நிலைகளில் கரைக்கப்பட உள்ளன. பாதுகாப்புப் பணியில் சுமார் 2,500 போலீசார் ஈடுபட்டுள்ளனர்.